Lög Dýralæknafélags Íslands

Heiti félagsins er Dýralæknafélag Íslands, skammstafað DÍ. Félagið er fag- og stéttarfélag dýralækna. Heimili og varnarþing er þar sem heimili formanns eða aðsetur skrifstofu er hverju sinni.

Markmið félagsins er að vinna að sameiginlegum hagsmunum dýralækna á Íslandi með því að:

1. Efla samhug, viðkynni og ímynd stéttarinnar.
2. Standa vörð um starfsréttindi félagsmanna og tryggja hagsmuni þeirra og starfsaðstöðu.
3. Efla faglega þekkingu dýralækna með t.d. námskeiðum og fræðsluerindum.
4. Gera kjarasamninga og koma fram fyrir hönd þeirra félagsmanna sem þiggja laun samkvæmt kjarasamningum sem félagið gerir.
5. Annast umsýslu Rannsóknarsjóðs DÍ og annarra sjóða sem kunna að verða stofnaðir í nafni félagsins.
6. Mæta á opinberum vettvangi fyrir hönd stéttarinnar.

Félagar geta þeir orðið sem lokið hafa háskólaprófi í dýralækningum og fengið starfsleyfi á Íslandi. Aðild getur verið með eftirfarandi hætti:

1. Fag- og stéttarfélagsaðild þeirra sem greiða fag- og stéttarfélagsgjöld til DÍ.
2. Fagfélagsaðild þeirra sem greiða stéttarfélagsgjöld til annarra stéttarfélaga. Þeir greiða eingöngu fagfélagsgjald og hafa full félagsréttindi og félagsskyldur.
3. Aukaaðild dýralæknanema, dýralækna í framhaldsnámi, dýralækna sem dvelja erlendis í hálft ár eða lengur og dýralækna sem eru ekki í starfi í hálft ár eða lengur. Aukaaðild ber ekki iðgjald og veitir full félagsréttindi nema kosningarétt og kjörgengi.
4. Eftir 70 ára aldur geta félagsmenn sem eru enn við störf fengið endurgreidd þau félagsgjöld sem greidd eru framvegis, óski þeir þess.

Umsókn um inngöngu eða breytta aðild sendist skriflega til félagsins. Með umsókninni skuldbindur viðkomandi sig til að hlíta lögum og samþykktum félagsins og virða siðareglur þess.

Reikningsár fylgir almanaksárinu. Á aðalfundi eru kosnir tveir skoðunarmenn, annar úr röðum félagsmanna og hinn utan félagsins, sem einnig yfirfara reikninga Rannsóknarsjóðs og Vísindasjóðs DÍ. Stjórn skal leggja ársreikning fyrir skoðunarmenn eigi síðar en mánuði fyrir aðalfund.

Félagsgjöld eru ákveðin af aðalfundi. Félagsmenn sem hefja töku lífeyris eru undanþegnir félagsgjaldi og njóta áfram fullra félagsréttinda. Stjórn er heimilt að endurgreiða félagsgjald að hluta eða öllu leyti séu til þess sérstakar ástæður, t.d. veikindi eða önnur áföll.

Úrsögn skal send stjórn skriflega og tekur gildi við næstu mánaðamót. Greiði félagi ekki félagsgjald í eitt ár skal honum vísað úr félaginu, að undangenginni viðvörun með þriggja mánaða fyrirvara.

Aðalfundur kýs þrjá aðalmenn í stjórn (formann, ritara og gjaldkera) og einn varamann, einfaldri og leynilegri kosningu, öll til tveggja ára í senn. Uppstillingarnefnd kannar hug félagsmanna og kynnir frambjóðendur með aðalfundarboði.

Formaður hefur, ásamt stjórninni, yfirumsjón með framkvæmdum félagsins, boðar stjórnarfundi og stjórnar þeim. Formaður hefur prókúru og fullan aðgang að reikningum félagsins ásamt gjaldkera.

Stjórnarfundir eru lögmætir ef minnst tveir stjórnarmenn mæta. Ritari skráir fundargerðir. Varamaður er ávallt boðaður og hefur málfrelsi og tillögurétt, en atkvæðisrétt einungis í forföllum aðalmanns.

Aðalfundur skal haldinn í tengslum við faglegt dýralæknaþing á fyrsta ársfjórðungi ár hvert og boðaður með minnst tveggja vikna fyrirvara. Fundarboði fylgja skýrsla stjórnar, tillögur að lagabreytingum og ársreikningar.

Á dagskrá eru m.a. skýrsla stjórnar, reikningar félagsins og sjóða þess, ákvörðun félagsgjalda, lagabreytingar, skýrslur nefnda, kosning stjórnar, skoðunarmanna, uppstillingarnefndar, stjórnarmanns í Vísindasjóð, siðanefndar og fimm manna samninganefndar.

Ef aðalfundur er ekki lögmætur skal boða til aukaaðalfundar með sama hætti og telst hann þá lögmætur.

Stjórn getur hvenær sem er boðað til aukafunda. Henni ber að boða til félagsfundar ef minnst tuttugu félagsmenn óska þess skriflega.

Tillögur um lagabreytingar skulu berast stjórn a.m.k. mánuði fyrir aðalfund. Lagabreytingar má aðeins gera á aðalfundi eða aukaaðalfundi og öðlast þær gildi ef tveir þriðju hlutar atkvæðisbærra fundarmanna samþykkja.