Sjóðir og styrkir
Tveir sjóðir eru á vegum DÍ, Vísindasjóður og Rannsóknarsjóður, auk þeirra sjóða BHM sem félagsmenn með stéttarfélagsaðild eiga aðild að.
Vísindasjóður DÍ
Sjóðurinn var stofnaður af Guðbrandi E. Hlíðar til minningar um foreldra sína, Guðrúnu Louisu og Sigurð E. Hlíðar, fyrrverandi yfirdýralækni. Skipulagsskrá sjóðsins var gefin út 22. júlí 1968 og endurskoðuð 24. apríl 1979. Sjóðurinn er eign Dýralæknafélags Íslands og félagar hafa árlega lagt honum til hlutfall af félagsgjöldum sínum.
Styrk má veita íslenskum dýralæknum til framhaldsnáms, til vísindastarfa á dýralæknasviðinu eða sem verðlaun fyrir ritgerðir byggðar á sjálfstæðum rannsóknum.
Hvernig er sótt um?
Umsókn er send á netfangið dyr@dyr.is og henni skal fylgja:
- afrit af prófskírteini vegna námsgráðunnar sem styrkumsóknin á við, eða
- staðfesting frá skóla um að nám sé hafið, ef námið tekur 3 ár eða lengur og a.m.k. 60 ECTS er lokið.
Úthlutunarreglur
- Umsóknir frá félagsmönnum sem hafa verið í DÍ í a.m.k. 12 undangengna mánuði ganga fyrir.
- Nám til doktorsgráðu (180 ECTS) hlýtur hámarksúthlutun; aðrar gráður samkvæmt fjölda ECTS, þó aldrei minna en 60 ECTS.
- Hæstu prófgráður hvers umsóknartímabils hafa forgang og heildarúthlutun miðast við ávöxtun sjóðsins árið á undan.
- Sjóðstjórn ákveður árlega upphæð hámarksstyrks.
Verklagsreglur samþykktar af stjórn 11. nóvember 2020.
Skipulagsskrá
Sjóðurinn er stofnaður til minningar um Sigurð Einarsson Hlíðar, yfirdýralækni, og konu hans Guðrúnu Louisu Hlíðar. Stofnfé er kr. 80.000.
Sjóðurinn er eign Dýralæknafélags Íslands.
Sjóðsstjórn skipa þrír dýralæknar: yfirdýralæknir, sem jafnframt er formaður sjóðsstjórnar, einn dýralæknir kosinn af stjórn DÍ og einn kosinn af aðalfundi DÍ, báðir til tveggja ára í senn.
Höfuðstól sjóðsins má aldrei skerða. Hann skal ávaxta með bankavaxtabréfum, bréfum útgefnum eða tryggðum af ríkissjóði, eða á annan jafn öruggan hátt að dómi sjóðsstjórnar.
Reikninga sjóðsins skal endurskoða með sama hætti og reikninga Dýralæknafélags Íslands.
Af vöxtum sjóðsins skal jafnan leggja þriðjung við höfuðstólinn en tveimur þriðju má úthluta á hverju ári. Frá því höfuðstóllinn nær kr. 250.000 má veita árlega alla vexti hans.
Höfuðstólinn skal að öðru leyti efla með frjálsum gjöfum eða áheitum.
Af úthlutunarfénu má veita íslenskum dýralæknum styrk til framhaldsnáms, til vísindastarfa á dýralæknasviðinu eða sem verðlaun fyrir ritgerðir um skyld mál, byggðar á sjálfstæðum rannsóknum.
Sjóðsstjórn er heimilt að veita öðrum einstaklingum eða starfshópum viðurkenningu fyrir mikilvæg störf á sviði dýralækninga. Úthlutun fer fram 4. apríl ár hvert, í fyrsta skipti 1975, á níræðisafmæli Sigurðar E. Hlíðar.
Leita skal staðfestingar forseta Íslands á skipulagsskránni. Nr. 206, 24. apríl 1979.
Rannsóknarsjóður DÍ
Rannsóknarsjóður Dýralæknafélags Íslands varð til við undirritun kjarasamnings við ríkið árið 1989. Markmið hans er að auka tækifæri félagsmanna til framhaldsmenntunar, endurmenntunar, rannsókna og þróunarstarfa. Stjórn sjóðsins er skipuð af stjórn DÍ.
Samband íslenskra sveitarfélaga og Reykjavíkurborg greiða fyrir félagsmenn í sjóðinn, 1,5% af föstum dagvinnulaunum. Sumir dýralæknar á almennum markaði hafa komist að sambærilegum samningum. Styrkir miðast við þá upphæð sem lögð er til sjóðsins fyrir hvern félaga, og aðild eiga aðeins þeir sem greitt er fyrir.
Sjóðir BHM
Félagsmenn DÍ með stéttarfélagsaðild eiga aðild að sjóðum Bandalags háskólamanna. Sjóðsaðild getur verið misjöfn eftir starfsvettvangi.